Menden frögger un vandage:
Met Tatütata düör de Stadt

Eisbär Ferdinand Heinrich erinnert sich an die Gründerzeit der Mendener Berufsfeuerwehr. Als sich die Wehr noch neben dem alten Schlachthof befand.

Äostern wass vüörboi un uese drai ölleren Strategen, Hennerich, Wilm un Kaal harren iähre Nummedaggsrunne länges de Hüönne un düör de Linne ächter siek. Sai harren siek 'ne ganze Woile ankieken, biu me de Müehle - säo nannte me dat fröggere Walzwerk van Schmoile - plattmääk. Se harren tüskendüör ümmer woier haort, biu dai Autos met ,Signalhäörn', frögger sagg me met Tatütata düör de Stadt siuseren.

Se wäörn boi Männe ankummen un graa harren se bestallt, dao käämen äuk al Jupp un Therro. Dai boiden harren ois im Gaorn te daun hat un wäörn säo richtig düösterig. Dai oiste ,Halwe' wass raske iutdrunken. Dann kaom Jupp op deän Busunfall vam 9.4. te kuiern, dai an de Schloipmüehle passoiert wass.
[vgl. Einsätze 2001]

,Junge', sagg hai, ,iek wass di ratz ferrig, as iek daovan haor. Teoist dach me jao, da halwe Stadt wäör affbrannt. Et geng jao bläoß Tatütata un dann äuk noch Sirenenalarm.'
,Jao', sagg Kaal, vandage kann me raske äuk met stillem Alarm 'ne gröttere Tahl Luie tesammentrecken. Nit bläoß boi Fuier sonnern äuk boi säo gräoten Insätzen biu daoboi odder wann maol de Keller vullläupen sind. Niks mäh met Ziegenhirt op'm Draohtiesel un met soinem Häörn.'

Säo käämen se dann op dai ollen Toien boi de Fuierweähr te kuiern un vüör allem, biu dat met deär oisten ,Berufs-Feuerwehr' anfangen harre.
Hennerich konn daotau niu säo'n bietken mäh vatellen. ,Niu', sagg hai, ,iek hewwe vüör längerer Toit maol met ,Eisbär' kuiert.' - ,Eisbär?' fraig Therro daotüsken, ,bai is dat dann?' - ,Bat, deän kennst Diu nit?' vawünnere siek Hennerich. ,Dat is de oinzig noch Leäwende van deän Fuierweährluien deär oisten Stunne, dai van Beraups weägen Fuierweährluie waorn sind. Dat is Heinrichs Fernand. Dai annern wäörn Huchtemeiers Hermann un Hufnagels Fritz, dai met iähm op oiner Schicht wäörn. Op deär annern Schicht wäörn Winterbachs Franz, dai äuk Tambourmajor van de Spiellmöpse [:-)] wass, Drögen Lutz un Clemens Heine, äuk ,Räppelken' genannt, woil hai Trommler was.'

,Un bao sind dai anfangen?' woll Therro wietten. ,Dai Wache niu is jao noch nit säo olt.'
,Anfangen sind dai daomaols in oiner ollen Baubude boim Städtsken Fuhrpark tiegen deäm ollen Schlachthuis - vandage Parkplass. In düeser Bude stönnen twoi Berrens üöweroin un oinet daotiegen. Düese äörn met Sträohsäcken iutstaffoiert. Et konn di passoiern, dat et det nachts anfeng te kribbeln un dat Diu fastestallen mochest, dat in deäm Sträohsack Muise anfangen wäörn te nisten.

Dat ganze wass oin Rium! Schlaopen un wuohnen in oinem un daozau noch de Spritkannister - vandage iut Fuierschutzgrünnen üöwerhäupt nit denkbar. Owwer Telefon wass wennigsten dao: No. 2411!
Dann droff me 1949 ümtrecken. Baohenne? In oine beättere Baracke ächter'm Gymnasium. Düese wass Enne det Kroiges bugget waorn füör Gefangene. Doilwoise wäörn dao äuk Teäckroiwen inlagert waorn. Et wäör joidenfalls gröttere Ruime un et konnen de Autos in de Karaaschen stallt wään. In düesem Bau gaffte't anfangs noch de Soppenküecke füör de Schailer vam Gymnasium. Un wiettet let, bat dai füör Uniformen drüögen? Vam Tommy affgesatte! Dai wäörn im Tuchthius in Werl ferrigmaaket un feärwet waorn - üöwrigens ganau biu de Polzai-Uniformen äuk.
Stracks tiegenan wass dann dai Sportplass ,Am Gymnasium', bao Alemannia Menden Fautball, owwer vüör allem Handball spiellere. Dai harren gräotet Glücke. Wann op deäm Sportplass bat passoiert wass, krieg me boi de Fuierweähr fotts Hülpe odder konn raske in't Krankenhuis transportoiert wään.'

,Könnt Iet Ink dann äuk noch besinnen, dat düese Plass düör de Toidungen in de Ostzäone geng?' miskere siek Jupp in. ,Dai Iutfahrt füör de Fuierweähr geng üöweroine Ecke vam Sportplass weäg - direkt ächter Studiendirekter Volpers Hius - un wass asphaltoiert. Wann de Fuierweähr iutrücken moch, moch dat Spiell kuorterhand unnerbruoken wään. Dat wass daomaols Waater op de Propagandamüehlen im Äosten.'

,Iek matt niu owwer nomaols trügge kummen op dai Toit, bao de Wache viell te dünne besatt wass. Wann't dao Alarm gaff, geng manges Frau Nölken, dai Frau vam Gymnasiums-Hiusmester, an't Tellefon odder dai Fuierweährluie harren oinen guerren Draoht taum Schauldirekter un dai oine odder annere Schailer iut deän uoweren Klassen waor froigestallt, üm Näotdenst am Tellefon te maaken.'

,Is op deäm Sportplass nit äuk maol Kiärmisse weäsen?' woll Therro wietten.
,Jao,' nuckere Wilm, ,säo Enne deär Fiftiger Jaohre. Dao harren se de Achterbahn un dat Kölner Hännesken op deäm Plass opbugget. Owwer oinige Jaohre frögger wass säogaar 'ne 'Eis-Revue' unnerm Teltdaak op deäm Plass.'
,Niu owwer maol terügge no de Fuierweähr!' mahnere Jupp 'n bietken ungehollen. ,Bao wäörn boispiellwoise de Waaterschloiche droiget un bat wass im Kroige?' ,Alsäo', naohm Hennerich deän Faam woier op, ,de Schloiche wäörn im Täuern an de Turmstraote ophangen. Dai mochen van Hand häoge trocken wään. Wann de daoboi nit oppässest, wäörs'te unnen im Täuern klatschnatt. Mäh noch as de Schloiche sewwes. Un niu wollst Diu noch mäh üöwer de Fuierweähr im Kroige wietten, Jupp?
Oismal wass häoge im Täuern van St. Vincenz oine Fuierwache met Tellefon inrichtet waorn. Van daoheär harre me deän besten Üöwerblick üöwer de ganze Stadt. Düese Stoie wass vüör allem nachtsüöwer ümmer besatt. Dann harre me oine Fuier-Lösch-Polzai opstallt. Et mochen ümmer säo üm de 8 Fuierweährluie in Beroitskop soin. Dai sääten aowends dann boi Rehbein - Gasthuoff ,Zur Krone' - vandage Fielmann, üm te wachten, off se taum Insatz raupen wäörn - odder äuk nit. Wann dann Alarm kääm, mochen se fotts opbreäcken. Dann geng et bit no Hagen, Wuppertal, Hamm, jao säogaor bit no Köln mochen se foihern un lösken helpen - bao graa dai Bombenangrieppe am schlimmsten wäörn.'

,Niu lott gnaug soin vüör vandage,' sagg Wilm. ,Dat wass jao woier maol schoin taum Tauhäörn. Wellt ve huoppen, dat dai nigge Wache met iährem Personal un iähren Autos nit allteviell te daun kritt. Lott ues säoviell daoboidaun!'
Säo harren alle oismal woier gnaug taum Simmeloiern.